ജലരാജാക്കന്മാർ 23ന് നീരണിയും വള്ളുവൻ കടവിൽ തുഴമേളം

കണ്ണൂർ: ഓളപ്പരപ്പുകളിൽ ആവേശത്തുഴ മിന്നിച്ച് വള്ളുവൻകവിൽ ജലമേളക്ക് ഇനി നാളുകൾ മാത്രം. വള്ളുവൻകടവ് ശ്രീ മുത്തപ്പൻ മടപ്പുരയുടെ ആഭിമുഖ്യത്തിൽ ഈ മാസം 23നാണ് ഉത്തകേരള വള്ളംകളി ജലോത്സവം നടക്കുക. ഉത്തരകേരളത്തിലെ അറിയപ്പെടുന്ന സ്പോർട്സ് ക്ലബ്ബുകൾ മത്സരത്തിൽ പങ്കാളികളാകും. കഷ്ണപ്പിള്ള കാവുംപിറ, വിഷ്ണു മൂർത്തി ബോട്ട് ക്ലബ്ബ് കുറ്റിവയൽ, എ കെ ജി പൊടോതുരുത്തി എ ടീം, വയൽക്കര വെങ്ങാട്ട്, എ കെ ജി മയ്യിച്ച, റെഡ്സ്റ്റാർ കാര്യങ്കോട്, പാനിച്ചാൽ അച്ചാംതുരുത്തി എ ടീം, വയൽക്കര മയ്യിച്ച് എ ടീം, ന്യൂ ബ്രദേഴ്സ് മയ്യിച്ച. ഇ എം എസ് മുഴക്കിൽ തുടങ്ങിയ പത്ത് ടീമുകളാണ് മത്സരത്തിൽ പങ്കെടുക്കുന്നത്.

പുഴയിലും കരയിലും ഒരു പോലെ ജലമാമാങ്കത്തിന്റെ ആരവമുയരുന്ന വള്ളംകളിക്ക് ഒരുക്കങ്ങൾ പൂർത്തിയായി വരുന്നതായി സംഘാടക സമിതി കോ-ഓർഡിനേറ്റർ മുരളി മോഹൻ, വള്ളംകളി മത്സര സംഘാടക സമിതി ചെയർമാൻ എ അച്യുതൻ , കൺവീനർ എംകെ രമേശൻ എന്നിവർ അറിയിച്ചു. 23ന് ഉച്ചക്ക് 2.30ന് സ്പീക്കർ എ എൻ ഷംസീർ ഉദ്ഘാടനം നിർവഹിക്കും. സിനിമാ നടൻ ദേവൻ മുഖ്യാതിഥിയായിരിക്കും. കാലത്ത് 9 മണി മുതൽ തിരുവാതിര, ഒപ്പന, മാർഗ്ഗംകളി, നൃത്തനൃതങ്ങൾ, അഥീന നാടക വീട് മയ്യിൽ അവതരിപ്പിക്കുന്ന നാട്ടുമൊഴി തുടങ്ങിയ കലാപരിപാടികൾ നടക്കും.

      ചടങ്ങിൽ കെ വി സുമേഷ് എം എൽ എ അധ്യക്ഷത വഹിക്കും. കെ സുധാകരൻ എം പി, അഡ്വ. പി സന്തോഷ് കുമാർ എം പി, ജില്ലാ പഞ്ചായത്ത് പ്രസിഡന്റ് പി പി ദിവ്യ, ജില്ലാ കലക്ടർ ഡോ. എസ് ചന്ദ്രശേഖർ, സിറ്റി പോലീസ് കമ്മീഷണർ ആർ ഇളങ്കോ, റെയിൽവെ ബോർഡ് ചെയർമാൻ പി കെ കൃഷ്ണദാസ്, നാറാത്ത് ഗ്രാമപഞ്ചായത്ത് പ്രസിഡന്റ് കെ രമേശൻ, ലഫ്റ്റനന്റ് ജന. വിനോദ് നായനാർ, കെ എൻ മുസ്തഫ, അബ്ദുൾ കരീം ചേലേരി, എൻ ഹരിദാസ്, കെ ബൈജു, പ്രജിത്ത് മാടം, പി ശിവപ്രസാദ് തുടങ്ങിയവർ സംസാരിക്കും.